ဖိုရမ် အဆောက်အအုံ

ဒီနေ့ ရုံးပိတ်ရက် ဆိုတော့ ကျနော် အေးအေးဆေးဆေးနားရင်း စာအုပ်တွေ ထိုင်ဖတ်လိုက်၊ ဝပ်ဆိုက်တွေ ဝင်ကြည့်လိုက်၊ ဒီဇိုင်းအကြောင်းလေးတွေ စဉ်းစားလိုက်လုပ်ရင်း အားလပ်ချိန်ကို အပြည့်အ၀ အသုံးချနေမိပါတယ်။ 

ကျနော့သူငယ်ချင်း MMO ကို ရုံးပိတ်ရက် အလည်ခေါ်ထားတော့ သူ့ကိုစောင့်ရင်း ဟိုတွေးဒီတွေးပေါ့။ ရာသီဥတုလေးကလည်းကောင်းတော့ ဘာညာသရကာလေး မှီဝဲရမလားလည်း ကြံစည်နေမိသဗျ။ ကိုယ့်လူကလည်း စိန်ခေါ်ရင် ဘွာမခက်သူဆိုတော့ အတော်ညှိနေရမယ်ဆိုတာ တွေးနေမိတယ်။ 

စာဖတ်နေရင်း တယ်လီဖုန်းက ဆဲဗင်းဒေးသီချင်းသံထွက်လာတော့ ဘော်ဒါကြီးလာပြီဆိုတာ အတတ်သိလိုက်ပြီ။

ခဏနေအကြာတွင် အိမ်ရှေ့က တံခါးခေါက်သံ ကြားသဖြင့် စာအုပ်ကို စားပွဲပေါ်ပစ်တင်လိုက်ပြီး တံခါးသွား ဖွင့်ပေးလိုက်သည်။ ဟူးခနဲ သက်ပြင်းချသံနှင့် ကျောပိုးအိပ်ကို ဆွဲရင်အိမ်ထဲရောက်မဆိုက် MMO ပြောလိုက် တာက….

MMO : ကိုသန့်ဇင်ရေ… ကျနော်တို့တွေလည်း ဖိုရမ်မှာ စာမရေးဖြစ်တာအတော်ကြာပြီနော်။

MTZO: အေးဟုတ်တယ်… ဒါနဲ့ ကျနော်ဖတ်ထားမိတာလေး တစ်ခုရှိတယ်ဗျ။

MMO : အင်း ဟုတ်လား… ဘာများလဲ… ကောင်းရင်တင်ရအောင်လေ။

MTZO: ကျနော်ဖိုရမ်ကို တနေ့က ဝင်မွှေတော့ Amazing Building မှာ ကျနော်တို့ ဘာမှရေး မထားရ သေး ဘူးဗျ။ ကိုထွန်းအောင်ကျော်၊ ဂျွန်မိုးအိမ်နှင့် ဂျာကြီးတို့တော့

ဓါတ်ပုံတွေနဲ့ တင်ထားတာတွေ့တယ်…။

MMO : အင်း ကျနော်လည်း စဉ်းစားထားတာတွေ တော့ရှိတယ် မရေးနိုင်သေးဘူးဖြစ်နေတာ။

MTZO: ခု ကျနော်ဖတ်ထားတဲ့ ဖိုရမ်အဆောက်အအုံက တမျိုးစိတ်ဝင်စားဖို့ ကောင်းတယ်ဗျ။

MMO : အန် … ဘယ်နဲ့ ဖိုရမ် အဆောက် အအုံလဲ… ခင်ဗျားကလည်း ကျနော် ဖိုရမ်အကြောင်းပြောခါမှဒါနဲ့ အဲဒီ ဖိုရမ်ဆိုတဲ့ အဆောက်အအုံ ဆိုတာတကယ်ရှိနေသလား။ ဒါဆိုရင် ကျနော့ကိုပြောပြဗျာ။

MTZO: ဒီမယ်ဗျာ ဒီပုံလေးတွေကို ကြည့်။ အဲဒါ ဖိုရမ်အဆောက်အအုံတဲ့ ။ အင်္ဂလိပ်လို Forum Building ဆိုတော့ ဖိုရမ်အဆောက်အအုံလို့ပဲ ဘာသာပြန်လိုက်တာလေ။ ဟဲဟဲ မမိုက်ဘူးလား။

MMO : အင်း… အတော်လှတာပဲ။ အဝင်ဝပုံစံက စိတ်ထဲတစ်မျိုးပဲ။ အဝင်ဝက cantilever ကြီး အောက်ကို ရောက်သွားရင် အဆောက်အအုံကြီး ပြိုကျလာမလား ထင်စရာကြီးဗျာ။ ပုံကြည့်တာတင် အဝင်ဝမှာ အဖိစီး ခံလိုက်ရသလားပဲ။ ထားပါတော့။ ကျနော်ခံစားလိုက်ရတာလေး ပြောကြည့်တာ။ ဒါနဲ့ အဲဒါ ဘယ်မှာ ရှိတာ လဲဗျ။

MTZO: စပိန်နိုင်ငံ ဘာစီလိုးနားမြို့တော်မှာရှိတယ်ဗျ။ စပိန်နိုင်ငံဆိုတော့ နွားရိုင်းသတ်ပွဲတွေ ကျင်းပတဲ့ နိုင်ငံထင်တယ်ဗျ။ အဲဒါတော့ ထားပါဗျာ။

MMO : အော်… ၁၉၉၂ ခုနှစ်မှာတုန်းက အိုလံပစ်ပွဲတော်ကို အိမ်ရှင်လုပ်ခဲ့သေးတယ်နော်။ အဲဒီပွဲပြီးတာနဲ့ ဘာစီလိုးနားလည်း အတော်လေး ထင်ရှားပြီးဥရောပရဲ့ အချက်အချာနေရာတစ်ခု ဖြစ်သွားတာပေါ့။ ဒါနဲ့ အဲဒီအဆောက်အအုံအကြောင်းဆက်ပါအုန်း။ ဘယ်သူဆောက်ခဲ့တာလဲ။ ဗိသုကာပညာရှင်ကရော ဘယ်သူများလဲဗျ။

မသေချာရင် စာအုပ်ထဲပြန်ကြည့်ဗျာ။

MTZO: ဒီမှာဗျာ ဗိသုကာတွေက ဆွစ်လူမျိုး အာခီတတ်နှစ်ယောက်ဗျ။ Jaques Herzog နှင့် Pierre de Meuron ဆိုတဲ့နှစ်ယောက်ပဲ။ သူတို့နှစ်ယောက်ပေါင်းပြီး ဆွစ်ဇာလန်နိုင်ငံ (Switzerland) ဘက်ဆဲလ်(Basel) မြို့မှာ ၁၉၇၈ခုနှစ်က Herzog & de Meuron Architekten, BSA/SIA/ETH (HdeM) ဆိုတဲ့ ဆွစ်အာခီတတ် အဖွဲ့ တစ်ခု တည်ထောင်ခဲ့ကြတယ်ဗျ။ သူတို့နှစ်ယောက်လုံးက ဇူးရစ်(Zürich) မှာရှိတဲ့ Swiss Federal Institute of Technology (ETH) ETH Zurich (German: Eidgenössische Technische Hochschule Zürich) မှာ ကျောင်းအတူတက်ခဲ့ကြတယ်ဗျ..။

MMO : အင်း…ဟုတ်ပါပြီ… သူတို့အကြောင်းတော့ဒီလောက်ပဲထားပါတော့ဗျာ။ အဆောက်အအုံအကြောင်းဆက်ပါအုန်း။

MTZO: အိုကေဗျာ။ အဆောက်အအုံပုံစံက တြိဂံထုပုံစံရှိတယ်။ သူ့ကို ဧကလေးဆယ်ကျော်ကျယ်ဝန်းတဲ့ မြေကွက်ထဲမှာ ဆောက်ထားတာပေါ့။ သူ့ရဲ့ အဓိကထင်ရှားစေတဲ့ အချက်က ၂၀၀၄ခုနှစ် ယဉ်ကျေးမှုဆိုင်ရ နှီးနှောဖလှယ်ပွဲရဲ့ ဗိသုကာမှတ်တိုင်လို့ ဆိုကြတာပဲ။ တချို့ကလည်း ဘာစီလိုးနားရဲ့ အကောင်းဆုံး အဆောက် အအုံ လို့လည်းဆိုကြပြန်တယ်…..။

MMO : အေးဗျာ ဒါဆို ဆွစ်လူမျိုးတွေရဲ့ဂုဏ်ယူစရာအဆောက်အအုံတစ်ခုလို့ ဆိုနိုင်တာပေါ့။ ဒါနဲ့ အဆောက်အအုံရဲ့ အကြမ်းဖျဉ်းအတိုင်းအတာတွေရော သိလားဗျ။

MTZO: အနားတစ်ဘက်ကို ၅၂၅ပေ စီရှိတယ်။ အမြင့်ကတော့ ၈၅ပေ အထိပဲဗျ။ သူ့ရဲ့တည်နေရာက Diagonal Avenue ၊ Rambla de Prim နှင့် the Ronda Litoral ဆိုတဲ့ ဘလောက်သုံးခုဆုံရာ နေရာမှာ ရှိတာဗျ။ အဲဒီနေရာဟာ ပင်လယ်နဲ့ကုန်းမြေဆုံရာ လို့ပြောလို့ရတာပေါ့။ အဲဒီတော့ ဒီအဆောက်အအုံကို ဒီဇိုင်းလုပ်တော့ သူတည်ရှိမယ့် နေရာလမ်းကျယ်ရဲ့ ဂျီသြမေတြီအပေါ် အခြေခံပြီး မြို့ရဲ့ ထောင့်မှန်ကွက် ပန္နက်ကို ကန့်လန့်ဖြတ် ပြီး ဆောက်ထားတာကြောင့် ကမ်းခြေရဲ့ သဘာဝအသွင်ကို ထင်ဟပ်စေတယ်ဗျ။

MMO : အင်း… ဒါနဲ့သူ့ရဲ့ အသွင်နဲ့ အရောင်အဆင်းလေးတွေလည်းပြောပြစမ်းပါအုန်း။

MTZO: တြိဂံပုံ အဆောက်အအုံ ကြီးပဲဗျ။ အဲသူ့ရဲ့ တြိဂံထုမျက်နှာပြင်ကို ပင်လယ်ပြင်မျက်နှာမူထားပြီး တြိဂံဦးချွန်ကို မြို့ဘက်ဦးတည်ပေးထားလိုက်တယ်။ သူ့ရဲ့ Concept က မြေပြင်ကနေမြှင့်ထားတဲ့ ကွန်ကရစ် ထု အပြင်အကျယ်ကြီးက ပင်လယ်ပြင်ကြီးကို ကိုယ်စားပြုတည်ဆောက်ထားတယ်တဲ့။ ကျန်တဲ့ သံမဏိ တြိဂံ ပြင်အချပ်ပေါင်း ၂၈၀၀၀ နဲ့ ဖွဲ့စည်းထားတဲ့ ပုံစံမတူတဲ့ မှန်ဖောင်းကြွ မျက်နှာပြင်တွေကတော့ ကောင်း ကင်ကြီးကို ကိုယ်စားပြုထားပါတယ်တဲ့။

MMO : အေးဗျာ အတွေးနှင့်လုပ်ထားတာတွေက အံ့သြလောက်တယ်နော်။ ကျနော်တို့တွေ စဉ်းစားလို့ မလွယ်နိုင်တဲ့ အတွေးတွေပဲဗျာ။ ထက်မြက်တဲ့ ဗိသုကာတွေရဲ့လက်မှာ သဘာဝကနေ ဆင့်ပွားယူလိုက်တဲ့ အတွေးတွေက သမိုင်းတင်အောင် လုပ်ဆောင်နိုင်တာပဲဗျ။ ဒါနဲ့ အတွင်းပိုင်းမှာရော ဘာတွေပါပြီး ဘယ်လိုတွေ စီမံထားသေးလဲ။

MTZO: တြိဂံထုကြီးအောက်ခြေမှာ မြို့ပြဆိုင်ရာ အင်္ဂါရပ်တွေနဲ့လျှော်ညီအောင် စီမံခင်းကျင်းထားတဲ့ ဟင်းလင်းပြင်ကျယ်ကြီး ပြုလုပ်ထားတယ်…။ မြှင့်ထားတဲ့ အဆောက်အအုံထဲမှာတော့ courtyard တွေက အမိုးအောက်မှာရှိတဲ့ ကွပ်လပ်တွေနှင့် အဆောက်အအုံအထပ်ထပ်ကို အပြန်အလှန် ဆက်စပ် ယှက်နွယ် နေစေပါတယ်။ ဒါအပြင် အဲဒီဆက်နွယ်မှုတွေကတဆင့် သစ်လွင်တဲ့ မြင်ကွင်းတွေ ထွေပြားဆန်းသစ်တဲ့ အလင်း ပြုလုပ်ချက်တွေ ရစေတယ်။ နောက် အဆောက်အအုံရဲ့ အဘက်ဘက်မှာဖောက်ထားတဲ့ အကွက် တွေမှာ လူတွေဖြတ်သန်းသွားလာလို့ ရနိုင်တယ်။ အဲဒီလိုဖြတ်သန်းသွားလာရင်း အဆောက်အအုံကြီးရဲ့ အံ့မခန်းဗိသုကာလက်ရာတွေ အောက်အနိမ့်ပိုင်းကနေ ကြည့်ရှုခံစားနိုင်တယ်။ အဒါတွေအပြင် အဲဒီနေရာ တွေကနေ အဆောက်အအုံ အပေါ်ထပ်တွေနှင့် မြေအောက်ထပ်တွေမှာရှိတဲ့ ၇၀၀၀ စတုရန်းပေရှိတဲ့ ပြခန်း၊ ထိုင်ခုံ ၃၂၀၀ ဆန့်တဲ့ ဟောပြောပွဲခန်းမ၊ ကွန်ဖရင့်ခန်းတွေ၊ စားသောက်ဆိုင်ခန်းတွေနှင့် အခြားနေရာတွေကို သွားလာနိုင်အောင်စီမံထားပါတယ်။

MMO : အဟား  အတော်လေး ကောင်းပါလားဗျာ။ ဒါနဲ့ ဒီကောင်ကြီး ဆောက်လိုက်တဲ့ အတွက် ဘာများထူးခြားသွားသေးသလဲ။

MTZO: အဲ…မြို့ပြစီမံကိန်းရှုထောင့်က ကြည့်ရင်တော့ အဲဒီအဆောက်အအုံဟာ မြို့တော်ရဲ့ ခမ်းနားတဲ့ သမိုင်းဝင် လမ်းမကျယ်တစ်ခုရဲ့ အထင်ကရ အဆောက်အအုံအဖြစ် ဘာစီလိုးနားကမ်းခြေ အနားသတ်လိုင်းမှာ landmark တစ်ခုအဖြစ် ရှိနေတာပေါ့ဗျာ။

MMO : အင်း ကိုသန့်ဇင်ရေ  အတော်လေး စုံစုံလင်လင်သိလိုက်ရလို့ ကျေးဇူးပဲဗျာ။ နောက်လည်း ကျနော်တို့တွေ တခြားအဆောက်အအုံတွေ အကြောင်းဆွေးနွေးကြသေးတာပေါ့။ ကဲ တာ့တာဗျာ ကျနော်အိမ်ပြန်လိုက်အုန်းမယ်။

လေးစားစွာဖြင့်

MTZO&MMO

ငွေ့ရည်ဖွဲ့ခဲ့မိသော အိပ်မက်များ

“လုပ်ထားတာတွေက တလွဲတွေချည်းပဲကွာ... တနေကုန် မင်း ဘာတွေလုပ်နေတာလဲ...”

ဆရာရဲ့ဒေါသဖြင့် ဆူပူလိုက်သောအသံက ကျနော့နားထဲ ခက်ထန်စူးရှစွာ တိုးဝင်လာသည်။  ရှက်ရွံ့မှုနှင့် ကြောက်ရွံ့မှုတို့ ရောစပ်ပြီး ထူပူနေမိသည်။  ဆရာခိုင်းထားသောပုံကို တွက်ချက်ဆွဲသားထားသည်မှာ လိုသလို မဖြစ်သဖြင့်  စိတ်ထဲမှာ ဝမ်းနည်းသွားမိသည်။ တနေကုန် ကွန်ပျူတာရှေ့ထိုင်ကာ  တကုတ်ကုတ် စဉ်းစား တွက်ချက် ပြီးဆွဲထား ခဲ့ခြင်းတို့အားလုံး ညနေဆရာပြန်လာချိန် ပြသောအခါ  သဲထဲရေသွန် ဖြစ်ကုန်သည်။

 

“ဒီပုံမှာလည်း Dimension တွေ  အကုန်တပ်လေကွာ... ဘာလဲ လက်သမားက မှန်းလုပ်ရမှာလား...”

 

ကြောက်ရွံ့သည့်အရှိန်နှင့် ယောင်ယမ်းကာ 

 

“ဟုတ်ကဲ့” ဟု ပြောလိုက်မိသည်။

 

“ဟ... လက်သမားတွေ မှန်းလုပ်ရမယ်ဆိုရင် မင်းကို ငါအဆွဲခိုင်းနေပါ့မလား။  အတိုင်းအတာမှန်သမျှ စုံအောင်တပ်ပေးရမယ် ဆိုတာလောက်တော့ ငါလိုက်  ပြောမနေချင်ဘူးကွ...”

“ဟုတ်ကဲ့ဆရာ”

“ဒါက ဒီလိုလုပ်ရတယ်ကွ...၊  ဒါတွေကို အဲလိုထားရင် အဆင်မပြေဘူး...

ဒါတွေကလည်း ...

ဒါတွေ  ...

ဒါလည်း ...

ခိုင်းရတာ စိတ်တိုင်းကျကို မဖြစ်ပါဘူးကွာ... မင်း  ဘာမှကို ကောင်းကောင်းမလုပ်နိုင်ပါဘူး... ဒါလေးတွေလောက်ကို မသိဘူး ...  အခါခါပြောလဲ အမှားတွေပါနေတာပဲ...”

 

ဆရာပြောသမျှ ငြိမ်နေရင်း ညှိုးငယ်စွာ  ရပ်နေခဲ့ရသည့် အချိန်များ

အလုပ်ဝင်ခါစ...

နေဝင်ခါနီး...

အလုပ်ဆင်းခါနီး...

ညနေခင်း...အချိန်များ...

ပြောရရင် ကျနော် အကြောက်ရွံ့ဆုံး

အမုန်းဆုံး  အချိန်များ...။

.............................. ....................................

အခန်းထဲမှာ  ပန်ကာရဲ့ လည်ပတ်သံသာ တဝီဝီမြည်နေသည်။ သင်တန်းခန်း ကျဉ်းကျဉ်းလေးထဲမှာ  သင်တန်း ဆရာက နီးဝေးမြင်းကွင်းပုံ (Perspective) ဆွဲသားနည်းအကြောင်း အသေးစိတ်ပြောပြနေသည်။ သင်တန်း ဆရာမှာ  ဖိလစ်ပိုင်လူမျိုးဆရာ။ အရပ်ပုပု၊ ခပ်၀၀၊ မျက်နှာ ပြုံးရွှင်ရွှင်နှင့်  ခင်မင်နှစ်လိုဖွယ် ကောင်းသည်။ ဆံပင်ရှည်ကို ကြက်တောင်စည်းထားပြီး  နားတစ်ဖတ်မှာလည်း နားကွင်းတပ်ထားသည်။ ထိုပုံသည် Interior Design  သင်ပေးသော ဆရာရဲ့အကြမ်းဖျင်းပင်။ Whiteboard soft pen ကို ဆရာ့လက်မှာ  ဆကိုင်ရင်း Whiteboard သင်ပုန်းမှာ ရေးခြစ်သွားသည့်ဒီဇိုင်းပုံက  ကျနော်တို့တွေ အံ့သြ ငေးမောသွားစေအောင် ဖမ်းစား နိုင်ပေသည်။

 

ပုံဆွဲနည်းသင်ပြီးတော့  ကျောင်းသားတွေဘက် မျက်နှာမူကာ 

 

“Interior Designer ဆိုတာ  အင်မတန်ပင်ပန်းတယ်။ သူ့မှာ အလုပ်စလုပ်ပြီ ဆိုတာနဲ့ စားလည်း ဒီစိတ်၊  သွားလည်း ဒီစိတ် တခါတလေ ညမအိပ်နိုင်အောင်ကို စဉ်းစားလုပ်ကိုင်ရတတ်တယ်။  သူ့မှာ မိသားစုရှိရင် မိသားစု တာဝန်တွေ လစ်ဟင်းလားတယ်။  ချစ်သူရည်းစားရှိရင် ချစ်သူရည်းစားတွေနှင့် အချိန်ပေးနိုင်မှု  နည်းလာတတ်တယ်။ ဆရာရဲ့ အချိန်တွေ အတော်များများကို အလုပ်ထဲမှာပဲ  နှစ်မြှုပ်ခဲ့မိလို့ ဆရာ့ချစ်သူနှင့် အဆင်မပြေဖြစ်ပြီး ကွဲကွာခဲ့ရဖူးတယ်။  ဆရာအိမ်ထောင်ကျချိန်မှာလည်း ဆရာ့ရဲ့အိမ်ပြန်ချိန် နောက်ကျမှုတွေကြောင့်  အိမ်ထောင်ရေးမှာ အဆင်မပြေတွေဖြစ်ခဲ့ရတယ်။ အဲဒီတော့ Designer တစ် ယောက်ရဲ့  ရူးသွပ်မှုဟာ တခါတရံမှာ ကိုယ့်ဘဝအတွက် အရေးကြီးတဲ့သူတွေကို  ဆုံးရှုံးရတတ်တယ်။

ဘယ်လိုဖြစ်ဖြစ်ပါ Designer ကောင်းတစ်ယောက်ကတော့  အဲဒီလိုဖြစ်နိုင်တာတွေကို ကောင်းကောင်း စီမံခန့်ခွဲနိုင်ပြီး  အကောင်းဆုံးစီမံလုပ်ကိုင်သွားနိုင်ပါတယ်။ ဒီဇိုင်နာတစ်ယောက်ရဲ့ ပီတိဟာ  သူ့ Design ပြီးဆုံးသွားချိန်မှာ ဒီဇိုင်းရဲ့ လှပမှု၊ သေသပ်မှု၊ ခန့်ညားမှု၊  လူတွေ တအံ့တသြ ဖြစ်နေမှု စတဲ့ အချက်တွေကို ကြည့်ပြီး တစိမ့်စိမ့်၊ တသသ  ပီတိဖြာနေခြင်းပဲ...။ အဲဒါဟာ Designer တစ်ယောက်အတွက် ဘယ်အရာနဲ့မှ  မလဲနိုင်တဲ့ အထွတ်အထိပ်သော စိတ်ရဲ့ခံစားမှုပေါ့။"

 

အေးအေးငြိမ်ငြိမ်ဖြင့်  တစ်လုံးခြင်းရှင်းလင်းစွာ ခံစားချက်အပြည့်ဖြင့် ပြောနေသော ဆရာ့ကိုကြည့်ကာ ကျနော်အံ့သြ လေးစားသွားမိသည်။ ဆရာရဲ့ ကိုယ်တွေ့ယှဉ်ပြီးပြောလိုက်သော  Designer တစ်ယောက်ရဲ့ ဘဝခံစားချက်တွေက ကျနော့ရင်ကို  လှုပ်ခက်သွားစေသည်။ ကျနော်ကိုယ်တိုင်လည်း ဘာကြောင့် Designer  ဖြစ်ချင်မှန်းမသိ။ စိတ်ထဲမှာ Designer ဆိုသော စကားလုံးက ကျနော့်ကို  အတော်ပင် ဖမ်းစားရူးသွပ် စေခဲ့သည်ကတော့ အမှန်ပင်။

.........................

“ဒီနေ့  Kitchen (မီးဖိုချောင်) နှင့်ပတ်သတ်ပြီး မင်းတို့ တစ်တွေကို  ဆရာပြောပြမယ်။ မီးဖိုချောင်ဆိုတာကို အိမ်တစ်အိမ်ရဲ့ အသဲနှလုံးလို့  ဆိုကြတယ်။ ဒါဟာ လည်း ဆိုသင့်တဲ့စကားပဲ။

ဘာကြောင့်ဆိုရင် Kitchen  ရှိမှသာ အိမ်လို့ ခေါ်ဆိုနိုင်မှာပဲ ဒါမှမဟုတ်ရင်တော့ အဆောင်တွေ  တည်းခိုခန်းတွေ ဖြစ်ကုန်မယ်။ အိမ်တစ်အိမ်အတွက် Kitchen ဆိုတာ  မဖြစ်မနေကို လိုအပ်တဲ့အရာပဲ။ ဒါကြောင့် Interior Designer တစ်ယောက်ဟာ  မီးဖိုချောင်ကို Design ပြုလုပ်တတ်ဖို့ အင်မတန်အရေးကြီးတယ်။  မီးဖိုချောင် တစ်ခုလုပ်တော့မယ်ဆို အသုံးပြုတဲ့သူတွေ Safety ဖြစ်ဖို့၊  သူ့ကို အသုံးပြုတဲ့အခါ Function ကျပြီး Comfortable ဖြစ်ဖို့၊ Aesthetic  လို့ ခေါ်ဆိုနိုင်တဲ့ အလှဗေဒ၊ အနုသုခမဟန် အမြင်မှာ ပသာဒဖြစ်စေတဲ့ ခံစားနိုင်စွမ်းလည်း ပေးဆောင်နိုင်ဖို့  စတဲ့အချက်တွေ အဓိကအခြေခံပြီး ဒီဇိုင်းလုပ်ရမယ်။ အထူးသဖြင့်  အိမ်တစ်ခုလုံးနဲ့ အဆင်ပြေပြေပေါင်းစပ်နိုင်အောင် ဖန်တီးပေးနိုင်ရမယ်။  ဒီဇိုင်းလုပ်တဲ့ အနေရာမှာ အရေးပါတဲ့ Design Harmony  ကိုလည်းထဲ့သွင်းစဉ်းစားရမယ်။  Design Harmony အတွက်တော့ Material တွေ၊   အသုံးပြုမယ့်  Accessories တွေ၊ Structural Component တွေနဲ့ နောက်ဆုံး  Finishing လုပ်ပြီးချိန်မှာ တွေ့ရမယ့် Color နဲ့ Texture တွေကို  စဉ်းစားရွေးချယ်ပြီး အကောင်းဆုံး အသင့်လျှော်ဆုံးဖြစ်မယ့် အတွဲအစပ်တွေ  ပြုလုပ်ပေးနိုင်ဖို့ပါ။

ဒါတွေအပြင် အရေးအကြီးဆုံးအချက်က အိမ်ရှင်မ  ဒါမှမဟုတ် ချက်ပြုတ် အသုံးပြုမယ့် သူတွေရဲ့စရိုက် (Culture) နဲ့ နေထိုင်မှု(Life style)  တွေကိုလည်း အဓိကထားစဉ်းစားရတော့မှာပါ။ နောက်ဆုံး  ထားရှိမယ့် နေရာ၊ သူ့ရဲ့ အကျယ်အဝန်း အနေအထား အရွယ်အစား နဲ့ Designer ရဲ့  Design Idea နဲ့ Concept တွေပေါ် မူတည်ပြီး မီးဖိုချောင်တစ်ခုရဲ့ လှပမှု၊  သပ်ရပ်မှု၊ အစီအစဉ်ကျနမှု၊ ဒီဇိုင်းခန့်ညားမှု စတာတွေကို တွေ့မြင်ရမှာပါ။

နောက်ဒီဇိုင်း  စဉ်းစားရာမှာလည်း မီးဖိုချောင်ထဲမှာ ချက်ပြုတ်လုပ်ဆောင်မယ့် Working  Triangle  ကိုလည်း အဆင်ပြေအောင် ညှိုနှိုင်းစီစဉ်ထားရပါမယ်။ Working  Triangle ဆိုတာ  မီးဖို(Cooker), လက်ဆေးကန် (Sink) နဲ့ ရေခဲသေတ္တာ ( Fridge )  အဲဒီသုံးခုကို လှည့်ပတ်သုံးစွဲနိုင်မယ့် အကွာအဝေးကိုပြောတာ။  အဲဒီအကွာအဝေးကို အများအားဖြင့် အနည်းဆုံး 12 ft (3648mm) 4 ft- 4t ft- 4ft ၊  အများဆုံး 22 ft(6688mm) 6ft-7ft-9ft လောက်ထားသင့်တယ်။ တချို့ 26 ft  လောက်အထိထားတာလည်း ရှိတယ်။

နောက် Kitchen Layout ပုံစံတွေအနေနဲ့လည်း

1.   One Wall Kitchen

2.   Corridor Kitchen

3.   L Shape Kitchen

4.    U Shape Kitchen

5.   Double L Shape Kitchen

6.   Peninsular  Kitchen

7.   G Shape Kitchen

8.   Island Kitchen ဆိုပြီး  အမျိုးမျိုး ပုံစံဒီဇိုင်းကို လိုက်ပြီးခေါ်ကြတာတွေ ရှိတယ်။ ဒါတွေဟာ  Kitchen တစ်ခုရဲ့ Design အခြေခံတွေပဲ။”

တရပ်စပ် ပြောသွားတဲ့ ဆရာ့  စကားတွေမှာ ငေးမောနေမိတယ်...။ Kitchen Design တစ်ခုအတွက် Rule and  Regulations တွေကို နားထောင်ရင်း စိတ်တွေ ဝေဝါးနေသည်။ ဆရာ့ စကားသံက  မကြားတချက် ကြားတစ်ချက်။

“Kitchen Design လုပ်ဖို့  လုပ်ငန်းလုပ်ပြီဆိုတာနှင့် ပထမဆုံး အချက်အရေးကြီးတာတွေက ကိုယ့်ရဲ့  အလုပ်အပ်နှံသူ Client အကြောင်း သေခြာသိအောင်လေ့လာစုံစမ်းမေးမြန်းရပါမယ်။  သူ့ရဲ့လိုအပ်ချက်ကို အတတ်နိုင်ဆုံး ဖြေ့ဆည်းပေးနိုင်အောင် Design  ကိုစဉ်းစားရတော့မှာပါ။

ကိုယ့် Client ရဲ့ မိသားစုဟာ  ဘယ်လိုပုံစံမျိုးလည်း မိသားစု၊ ကြီးသလား၊ မိသားစုဝင်အရေအတွက်  နည်းနည်းလေးလား။

နောက်မိသားစု ဝင်တွေမှာ ကလေးတွေပါလာသလား။  အဲဒီကလေးတွေကြီးလာရင်ရော အတူနေကြမှာလား။

Design စဉ်းစားရာမှာ Design ကို  အပိတ်မဖြစ်အောင် Lock မဖြစ်အောင် စဉ်းစားပေးရမယ်။ ဒီနေ့လုပ်လိုက်တဲ့  Design တစ်ခုဟာ နောက် ၅နှစ်လောက်မှာ  မလိုအပ်တာတွေ ပါနေတတ်တယ်။  ဥပမာပြောရရင်... အခုချိန် အိမ်ရှင်မှာ ကလေးတွေရှိတဲ့အတွက် ကလေးစားစရာတွေ  သံဗူးတွေ မျိုးစုံရှိဖို့လိုအပ်ပေမယ့်... နောက် ၁၅ နှစ်လောက် အကြာမှာ အဲဒီ  ကလေးတွေ အရွယ်ရောက်ချိန်မှာ အဲဒီနေရာတွေဟာ အဆင်မပြေဖြစ်နေတတ်တယ်...။  တခြားဘက်ကစဉ်းစားရင်ရော အခုချိန် အရွယ်ရောက်တဲ့သားသမီးတွေ ရှိနေရင်  နောက်တစ်ချိန် အဲဒီသားသမီးတွေ ကိုယ့်အိမ်ကိုယ်နေကြပြီး အဲဒီအိမ်ပိုင်ရှင်  Client ဟာ လူနည်းနည်းသာ အသုံးပြုနိုင်တော့မှာမျိုးလား။ အဲဒီတော့  အဲဒီအခြေအနေ တွေကိုပါ ထည့်သွင်း စဉ်းစားပေးရမယ်။

အဲဒါတွေသိပြီးရင်နောက် Kitchen မှာ ဘယ်နှစ်ယောက် ချက်ပြုတ်မလဲ။ Kitchen ထဲမှာပဲ Dining  Area စားဖို့နေရာ လိုအပ်သလား။ Kitchen ထဲမှာ မိသားစုဝင်တွေ ဘယ်လောက်  ကြာကြာ အချိန်ဖြုန်းကြမလဲ။ အဲဒီထဲမှာပဲ စာကြည့်မလား၊ တီဗီကြည့်မလား။  ကလေးတွေ ဂိမ်းကစားဖို့နေရာတွေပေးမလား။

နောက်ချက်ရင်ရော  ဘယ်လိုအစားအစာမျိုးတွေ ချက်ပြုတ်မှာလဲ။ ဈေးဝယ်ရင်ရော  ဘယ်လိုဝယ်မှာလဲ။ တစ်ပတ်စာ၊ တစ်လစာ ဒါမှမဟုတ်နေ့တိုင်း ဈေးဝယ်ထွက်မှာလား။

အိမ်မှာ  ဧည့်သည် အဝင်အထွက်များမယ်ဆို ပါတီပွဲတွေများ ကျင်းပမလား။ Kitchen  ထဲမှာ အသုံးပြုမယ့် energyစွမ်းအင်တွေကိုလည်း  ဘယ်လို ချွေတာသုံးစွဲလို့ရမလဲ။...စတဲ့အချက်တွေ အများကြီးစဉ်းစားရမယ်။” ဒါတွေကို အတွေ့အကြုံနှင့် လက်တွေ့လုပ်ဆောင်မှုတွေကသာ အလွယ်ကူ အချောမွေ့ဆုံးဖြစ်အောင်  လုပ်ဆောင် ပေးသွားနိုင်မှာပါ။ နောက် Kitchen စတိုင်အနေနဲ့  ဘယ်စတိုင်သုံးမှာလဲ ဆိုတာကိုလည်း ကြိုတင်လေ့လာရမှာပါ။ ကဲ အခုလောက်ဆို  Kitchen နှင့်ပတ်သတ်ပြီး အခြေခံ အချက်တွေ အတော်များများ သိလောက်ပါပြီ။

အခုဆရာ  layout plan တစ်ခုပေးလိုက်မယ် အခုပြောတဲ့ အချက်တွေကို အခြေခံပြီး Kitchen Design တစ်ခုရ အောင်ထုတ်ပေးကြပါ။”

“ဟုတ်ကဲ့ဆရာ”   

ဟု  သံပြိုင်အော်သံနှင့်အတူ လိုက်အော်ရင်း မိန်းမောနေသော ကျနော်ခါးမတ်ခါ  သတိပြန်ဝင်လာသည်။

ဆရာလာပေးသော စာရွက်ကိုယူလိုက်ရင်း အိတ်ထဲမှ  ခဲတံဗူးလေးကို ထုတ်ယူဖွင့်လိုက်သည်။ စာရွက်ထဲက  layout plan က ကျနော့ကို  ရွံတွန့်တွန့် ဖြစ်သွားစေသည်။

 

စာရွက်ကိုင်နေရင်း...

 

“ဒါက  ဒီလိုလုပ်ရတယ်ကွ...၊ ဒါတွေကို အဲလိုထားရင် အဆင်မပြေဘူး...

ဒါတွေကလည်း  ...........

ဒါတွေ .......

ဒါလည်း....

ခိုင်းရတာ စိတ်တိုင်းကျကို  မဖြစ်ပါဘူးကွာ... မင်း ဘာမှကို  ကောင်းကောင်းမလုပ်နိုင်ပါဘူး... ဒါလေးတွေ လောက်ကို မသိဘူး... အခါခါပြောလဲ  အမှားတွေပါနေတာပဲ...”

 

အလုပ်ဝင်စဉ်က ဆူငေါက်ခံခဲ့ရတဲ့  ဆရာစကားသံတွေကြားယောင်လာမိသည်။ စိတ်ထဲမှာ မွန်းကြပ် ကြောက်ရွံ နေမိသလို  ခနွာကိုယ်မှာ တုန်ရီမောဟိုက်နေမိသည်။

 

“အကိုဘာဖြစ်နေတာလဲ...  နေမကောင်းဘူးလား လက်တွေလဲ တုန်နေတယ်... ချွေးတွေလည်းပြန်နေတယ်...”

နံဘေးက  အတန်းဖော်သူုငယ်ချင်းစကားကြောင့် အသိပြန်ဝင်လာသည်... ကိုယ့်ကိုယ်ကို  သတိနှင့် ပြန်ထိန်းရင်း...“ဘာမှမဖြစ်ပါဘူး ကောင်းပါတယ်...” ဟု စကားပြန်ပြောရင်း ရှေ့မှာချထားသော စာရွက်ကို ကြည့်ကာ ခဲတံဖြင့်  စတင်ခြစ်လိုက်သည်။

(((((ထောက်...)))))

ဟာကွာ... စိတ်ထဲမှာ  ပိုကြောက်သွားမိသည်။

ကျိုးသွားသော ခဲတံအစကိုကြည့်ရင်း ငိုင်နေမိသည်။

“အကို  ခဲတံကျိုးသွားတာလား... ရော့ ကျနော့မှာ ခဲချွန်စက်ပါတယ်...။”

သူငယ်ချင်းဆီက  ခဲချွန်စက်ယူလိုက်ရင်း ခဲတံပြန် ချွန်နေလိုက်သည်။ စိုးရိမ်စိတ်တွေ၊ လောနေသော စိတ်တွေကို ထိန်းရင်း ဆရာဖြစ်သူကို သတိရမိနေသော  စိတ်ကိုတင်းပြစ်လိုက်သည်။

စိတ်ထဲမှာ အံကြိတ်ရင်း  

“ဆရာ  ကျနော်ဖြစ်အောင်လုပ်မယ်... ဆရာခိုင်းတာတွေ မဖြစ်ခဲ့တဲ့ တပည့်တစ်ယောက်  အခုချိန်မှာ Designer တစ်ယောက်ဖြစ်အောင် ကြိုးစားနေပါတယ်။ ကျနော် ကြိုးစား နေပါတယ်ဆရာ...”

..............................

"Designer  တစ်ယောက်ဖြစ်ဖို့အတွက်  Design ဆိုတဲ့ သွေးတွေ ခန္ဓာကိုယ်ထဲမှာ  စီးဆင်းနေမှကွ...။ မင်းရဲ့ခန္ဓာကိုယ်တင်မကဘူး မင်းရဲ့စိတ်ဓါတ်တွေမှာလည်း  Design ဆိုတဲ့ ဝိဉာဉ်ပူးဝင်နေမှ... နောက် မင်းရဲ့တွေးလိုက်တဲ့ အတွေးတွေမှာ၊  မင်းမြင်လိုက်တဲ့ အမြင်တွေမှာ၊ မင်းထိတွေ့လိုက်တဲ့ အထိတွေ့တွေတိုင်းမှာ၊  မင်းစားသောက်လိုက်တဲ့ အစာတွေရဲ့ အရသာတွေမှာ၊ မင်းရဲ့ ရှုလိုက်လိုက်တဲ့  လေထုတွေထဲမှာ Design ဆိုတဲ့ အရာကို ထည့်သွင်းမြှုပ်နှံထားရမယ်...။  ကုန်ကုန်ပြောမယ်ကွာ မင်းအိပ်ယာဝင်တာဖြစ်ဖြစ် ၊ အိမ်သာတတ်တာဖြစ်ဖြစ် မင်းရဲ့  ဘဝတစ်ခုလုံးမှာ Design ဆိုတာကို ဘဝနှင့်ထပ်တူ နေထိုင်ပစ်လိုက်မှသာ  Designer ကောင်းတစ်ယောက်ဖြစ်လာမှာကွ...။"

 

ဆရာ့စကားသံတွေ  တရေးရေးကြားယောင် နေမိသည်။ ကျနော့ကိုယ်ကို စဉ်းစားလိုက်တိုင်း အဲဒီစံတွေ အဲဒီပေတံတွေနှင့် တိုင်းတာလိုက်တိုင်း တုန်လှုပ်သွားခဲ့ရသည်။  သွေးကြောင်သွားခဲ့ရသည်။ ခြေလက်တွေ အေးစက် သွားခဲ့ရသည်။  ချွေးစေးတွေပြန်ခဲ့ရသည်။

မည်သို့ဆိုစေကာမူ ကျနော့အနေဖြင့် Designer  တစ်ယောက်ဖြစ်ခြင်း၊ မဖြစ်ခြင်းကို အလေးမထားတော့ဘဲ Design  ဆိုတဲ့စကားလုံးလေးကို ချစ်မြတ်နိုးနေခြင်းသည်ပင် ကျေနပ်ဖွယ် ကောင်းနေတော့သည်  မဟုတ် ပါလား။

..............................

လေးစားစွာဖြင့်

MMO


Reference image : http://www.huffingtonpost.com/2013/11/16/famous-ideas-from-dreams_n_4276838.html